O‘zbekiston Respublikasi “Hunarmand” uyushmasi tomonidan Axborot va ommaviy kommunikatsiyalar agentligi majlislar zalida “2025-yilning birinchi choragi davomida hunarmandchilikni rivojlantirish borasida amalga oshirilgan ishlar va kelgusidagi rejalari” mavzusida matbuot anjumani o‘tkazildi.
Matbuot anjumanida “Hunarmand” uyushmasi rahbar xodimlari, hunarmandlar va ommaviy axborot vositalari vakillari ishtirok etdi.
2025-yil 19-mart kuni “Kichik va o‘rta biznesning iqtisodiyotdagi o‘rnini oshirish chora-tadbirlari to‘g‘risida“gi Prezident Farmoni qabul qilindi. Ushbu Farmonga ko‘ra amalda bo‘lgan 43 ta hunarmandchilik yo‘nalishlari soni 32 ta deb belgilandi.
Matbuot anjumanida ta’kidlanganidek, 2025-yilning birinchi choragida usta-shogird an’analarini rivojlantirish orqali jami 15 176 ta ish o‘rinlari yaratildi. Shundan 1 741 nafari usta hunarmand, 13 436 nafari shogirdlar hisobiga to‘g‘ri keladi.
Bugungi kunda respublika miqyosda hunarmandchilikning 43 ta yo‘nalishi bo‘yicha jami 27,5 ming nafar hunarmandlar faoliyat yuritib kelmoqda. (shundan, 14,3 ming nafari (52 foiz) erkaklar, 13,2 ming nafari (48 foiz) ayollar). Jami a’zolarning 5,4 ming nafari yoki 20 foizi yoshlarni tashkil etadi.
Joriy yil birinchi choragida davomida 50 dan ortiq imkoniyati cheklangan hunarmandlarga uyushmaning a’zolik badali bo‘yicha imtiyozlar berildi.
Hunarmandchilik kirib borgan mahallalar soni 7 023 ta ga yetdi.
Hunarmandlarning xalq amaliy san’ati milliy katalogi yaratilib, faxriy va xalqaro ko‘rgazma hamda tanlovlarda g‘olib bo‘lgan 261 nafar ustalar ushbu katalogga kiritilgan. Shuningdek, 1,2 mingga yaqin hunarmandlar turizm reyestriga kiritilgan.
Joriy yilning birinchi choragi davomida xorijiy mamlakatlarda o‘tkazilgan 6 ta xalqaro festivalda 25 nafar hunarmandlar ishtirok etdi.
Shu bilan birga Amazon, Ebay va ETSY kabi xalqaro platformalarida hunarmandchilikning kulolchilik, kashtachilik, zardo‘zlik, yog‘och o‘ymakorligi, gilamchilik va qo‘lda gazlama to‘qish yo‘nalishlari bo‘yicha onlayn savdolar amalga oshirilmoqda.
“Hunarmand” uyushmasi tomonidan 2025 yil 1-choragi davomida xotin-qizlarni hunarga jalb etib, bandligini ta’minlash maqsadida 4 ta tumanda o‘quv kurslar tashkil qilinib, ularda 67 nafar ayollarga hunar o‘rgatildi.
O‘zbekiston Respublikasi Prezidentining PQ-4138-son qaroriga muvofiq usta-shogird an’analari asosida 2 ta JIEMda 2 ta o‘quv kurslari tashkil etilib, ularda 36 nafar mahkumlarga hunar o‘rgatildi.
O‘zbekiston Respublikasi Prezidentining “O‘zbekiston — 2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturi to‘g‘risida”gi PF-16-sonli farmonining 4-ilova 67.1-bandida “Hunarmandlarga xomashyoni arzon va tez yetkazib berish mexanizmlarini yaratish” vazifasi belgilangan. Topshiriq ijrosini ta’minlash maqsadida uyushma tomonidan 12 fevral kuni uyushma a’zolarining 50% (foizini) tashkil etuvchi to‘qimachilik sohasidagi hunarmandlarni xomashyo va dastgohlarga bo‘lgan talablarini o‘rganib chiqish maqsadida “Ochiq muloqot” tashkil etildi va hunarmandlar tomonidan bildirilgan talab va takliflardan kelib chiqib, uyushma yo‘l xaritasi ishlab chiqildi. Unga ko‘ra, markazlashgan xomashyo bilan ta’minlash istagini bildirgan Farg‘ona viloyati Marg‘ilon shahrida faoliyat ko‘rsatuvchi tadbirkor-hunarmandga Eron davlatidan tabiiy ranglar, chitgarlik va xattotlar uchun sun’iy ranglar, kulollar uchun kichik matorli dastgohlar olib kelishi uchun Uyushma tomonidan jami 150.0 mln.so‘m(bir yuzi yellik million so‘m) mablag‘, hunarmand tomonidan hunarmandlar uchun xarid qilingan umumiy qiymati 400.0 mln.so‘m (to‘rt yuz million so‘m)dan ortiq bo‘lgan xomashyo va asbob-uskunalar keltirildi.
Shuningdek, hunarmandlarni asbob-uskunaga bo‘lgan talabini qondirish maqsadida Uyushma tomonidan umumiy qiymati 45.0 million so‘m (qirq besh million so‘m)lik 50 dona jun xomashyosini tola qilib yigirib beradigan elektr hamda 1 dona jun titish dastgohi xarid qilinib, respublikamizning Surxondaryo, Qashqadaryo, Jizzax, Sirdaryo hamda Farg‘ona viloyatlarida faoliyat olib boruvchi hunarmandlarga bepul tarqatildi. Ma’lumot uchun: 1 dona jun xom ashyosini titib beruvchi dastgoh yordamida 100 nafar hunarmand junni yuvish va titish imkoniga ega bo‘ladi.
Shu bilan birgalikda O‘zbekistonda mavjud bo‘lmagan xomashyoni xorijiy mamlakatlardan olib kelish mexanizmi yaratilgan bo‘lib, unga ko‘ra har chorakda xorijiy davlatlarga tashrif buyurish orqali xomashyo bozorlarini aniqlash hamda olib kelish choralari ko‘rilmoqda. Jumladan, arzon xomashyo bozorlarini aniqlash, yetkazib berish hamda zamonaviy suvenir mahsulotlarini ishlab chiqish hamda kreativ hunarmandchilik yo‘nalishida hamkorlik qilish yuzasidan uyushma delegatsiyasining Eron hamda Tailand davlatlariga xizmat safari amalga oshirilib (2025-yil yanvar-fevral oylarida), kimyoviy moddalar, xususan indigo yetkazib berish bo‘yicha dastlabki kelishuvga erishildi.
Xususan, O‘zbekiston Respublikasi «Hunarmand» uyushmasi rahbari Rasuljon Mirzaaxmedov o‘zbekistonlik bir guruh hunarmandlar bilan birgalikda Eron Islom Respublikasiga xizmat safarida bo‘ldi.Tashrif davomida ikki tomonlama hamkorlik o‘rnatish, O‘zbekiston va Eronda hunarmandlarning ko‘rgazmasini tashkil etish, xalqaro festivallarda hunarmandlarning ishtiroki ta’minlash, har ikki davlat hunarmandlarining o‘zaro malaka oshirishi hamda Eronda mavjud xomashyo va asbob uskunalarni O‘zbekistonga import qilish masalalariga e’tibor qaratildi.
Shuningdek, O‘zbekiston Respublikasi «Hunarmand» uyushmasi raisi Rasuljon Mirzaaxmedov bir guruh o‘zbekistonlik hunarmandlar bilan birgalikda Tailand davlatida xizmat safarida bo‘ldi va kreativ hunarmandchilik mahsulotlarini tayyorlash bo‘yicha Tailand tajribasi o‘rganildi.
Matbuot anjumanida ta’kidlanganidek, “Hunarmand” uyushmasi tomonidan Startap loyihalari uchun jami 150 mln so‘m miqdorida tanlov e’lon qilinishi ma’lum qilinda. Tanlov tabiiy ekologik mahsulotlardan hunarmandchilik mahsuloti ishlab chiqarish, turizm yo‘nalishida suviner mahsulotlari ishlab chiqarish, hunarmandchilik mahsulotlariga mahalliy va xalqaro standartlarni joriy etilishi kabi maqsadlarni o‘z ichiga oladi. Tanlov shartlari “Hunarmand” uyushmasining rasmiy sahifalarida e’lon qilinishi bayon etildi.
Shuningdek, birinchi marotaba “Hunarmand” uyushmasi ta’sischiligida “Hunarmand” jurnalining birinchi soni nashr etildi. Ushbu jurnal bir yilda to‘rt marotaba o‘zbek, ingliz va rus tillarida chop etiladi. Matbuot anjumanida yakunida jurnalistlarni qiziqtirgan savollariga ma’ruzachilar tomonidan javob berildi.
“Hunarmand” uyushmasi Axborot xizmati